THIRRJE PËR APLIKIM

Përkrahje për digjitalizimin e NMVM-ve

Data e publikimit: 30 Prill 2025

Afati i fundit për aplikim: 30 Maj 2025

Përmbledhje e projektit

Digital Innovation Gateway for Kosovo (DIG-4K) është një iniciativë që ka për qëllim përshpejtimin e transformimit digjital të Kosovës dhe pozicionimin e vendit si një qendër rajonale për inovacionin digjital, zhvillimin e aftësive dhe sipërmarrjen. E udhëhequr nga Parku i Inovacionit dhe Trajnimeve (ITP) në Prizren, projekti funksionon me një konsorcium prej nëntë anëtarësh nga sektori privat, sektori publik dhe akademia. Iniciativa është e bashkëfinancuar nga Bashkimi Evropian përmes programit “Evropa Digjitale” (DIGITAL) 2021-2027, si dhe nga Qeveria e Kosovës, Ministria e Ekonomisë.

DIG-4K ka për qëllim ndërtimin e kapaciteteve digjitale në sektorë të ndryshëm, duke ofruar mbështetjen e nevojshme kryesisht për ndërmarrjet mikro, të vogla dhe të mesme (NMVM) dhe organizatat e sektorit publik.

Përmes një serie aktivitetesh të synuara, EDIH DIG-4K promovon adoptimin e teknologjive të avancuara digjitale, veçanërisht në sektorë si financat (e-komerc, fintech), shëndetësia, arsimi, mjedisi, bujqësia, bioteknologjia, industria kulturore dhe kreative, qytetet e mençura (Smart Cities) dhe sektorë tjerë duke mbështetur gjithashtu sipërmarrjen dhe shërbimet e orientuara nga inovacioni.

Llojet e Shërbimeve të EDIH

Duke u nisur nga dispozitat e Programit “Digital Europa 2021-2027”, Qendrat Evropiane të Inovacionit Digjital (EDIH) ofrojnë shërbime që mbështesin sektorët publik dhe privat në procesin e transformimit digjital të ekonomisë dhe shoqërisë, si dhe në nxitjen e inovacionit. Këto shërbime lidhen me fushat e mëposhtme:

• Testimi para investimit – Mbështetje për përdoruesit në zbatimin e aktiviteteve të testimit dhe eksperimentimit me produkte dhe shërbime digjitale që planifikohen të zhvillohen para fillimit të investimit.
• Zhvillimi i aftësive dhe trajnimi – Organizimi i trajnimeve, si dhe realizimi i programeve të shkurtra të trajnimit për përmirësimin e aftësive të avancuara digjitale.
• Mbështetje për qasje në mjete financiare – Ofrimi i shërbimeve këshilluese për përdoruesit në identifikimin e burimeve të financimit, përfshirë qasjen në institucione financiare, investitorë, dhe mekanizma dhe instrumente të tjerë financiarë.
• Rrjetëzimi dhe forcimi i ekosistemit inovativ – Nxitja e aktiviteteve inovative dhe këshillimore dhe shkëmbimi i njohurive ndërmjet anëtarëve të DIG-4K dhe përdoruesve të shërbimeve.

Ofruesit e Shërbimeve

Ofruesit e shërbimeve të përmendura në këtë Thirrje Publike janë anëtarët e mëposhtëm të konsorciumit të DIG-4K:

1. Innovation and Training Park (ITP), Prizren (Koordinator)
2. QUANTIX L.L.C, Prishtinë (Partner Implementues)
3. UNIVERSITETI NDËRKOMBËTAR PËR BIZNES DHE TEKNOLOGJI UBT SHPK Prishtinë (Partner Implementues)
4. Edutask SH.P.K. Prishtinë (Partner Implementues)
5. MAKERSPACE - INNOVATION CENTER PRIZREN (Makerspace), Prizren (Partner Implementues)
6. UNIVERSITETI UKSHIN HOTI (UUHP), Prizren (Partner Implementues)
7. Cacttus Education SH.P.K. Prishtinë (Partner Implementues)
8. ALT SH.P.K, Prishtinë (Partner Implementues)
9. Ministria e Ekonomisë, Kosovë / Rrjeti i Kërkimit dhe Edukimit në Kosovë (KREN) (Partneri i Asocuar)

Transformoni biznesin tuaj përmes përkrahjes nga Qendra e juaj Evropiane për Transformim Digjital (EDIH DIG-4K)!

Përfituesit e Shërbimeve

Mbi Tetëdhjetë (80) NMVM (Ndërmarrje Mikro, Vogla dhe të Mesme) do të përzgjidhen për mbështetje për zhvillimin e strategjive për transformim digjital. Transformimi digjital i NMVM-ve me model aktual biznesor mbështetet në qasje të strukturuar për NMVM-të e përzgjedhura, përfshirë vlerësimin e maturitetit digjital (Digital Maturity Assessment) dhe Vlerësimin e Nevojave për Digjitalizim (Needs Assessment) duke përfshirë edhe hartimin e planit apo strategjisë për transformim digjital. Më saktësisht, NMVM-të e përzgjedhura për mbështetje do të ju sigurohet ekspertizë për vlerësimin e modelit të biznesit, të proceseve, dhe të kulturës së punës, me qëllim përgatitjen e udhërrëfyesit për transformimin digjital (strategjinë).

E drejta e aplikimit

Thirrja është e hapur për të gjitha NMVM-të e regjistruara në Kosovë para datës 30 Prill 2025.

Ju lutemi referojuni detajeve lidhur me të drejtën e aplikimit dhe kritereve, të shpalosura në Shtojcën e bashkangjitur më poshtë në faqen 4 “Kriteret – Procesi i aplikimit dhe procedurat”.

Më shumë informata për Thirrjen për Aplikim: https://itp-prizren.com/dig-4k/calls-publications.html

Procesi i aplikimit

Aplikimi është i hapur prej datës 30 Prill 2025 deri më 30 Maj 2025

VËREJTJE: Vlerësimi dhe përzgjedhja e fituesve nga ana e komisionit do të bëhet gjatë periudhës sa është e hapur thirrja, përkatësisht çdo fundjavë të kësaj periudhe: 2 Maj, 9 Maj, 16 Maj, 23 Maj dhe 30 Maj. Nëse gjatë kësaj periudhe arrihet numri prej 80 NMVM-ve, thirrja do të konsiderohet e mbyllur dhe do të publikohet njoftimi per mbylljen e saj.

Palët e interesuara NMVM-të mund të aplikojnë duke plotësuar formularin e aplikimit në linkun vijues: APLIKO KËTU

Statusi për dorëzimin e suksesshëm të aplikacionit do të konfirmohet përmes njoftimit me email në adresën e njëjtë të dhënë në formularin e aplikimit.

Në fazën e parë të aplikimit nuk ka kërkesa për dokumentacion, mirëpo NMVM-të të cilat e kalojnë fazën e shqyrtimit fillestar të procesit të përzgjedhjes do të ju kërkohet dorëzimi i dëshmive/dokumentacionit të mëposhtëm. Dëshmitë kërkohen për tu dorëzuar vetëm nga aplikantët vetëm nëse përzgjidhen për të vazhduar më tutje.

• Dëshmi për regjistrimin e biznesit [Numri i regjistrimit të biznesit – NRB/NUI]
• Identifikimi i personit aplikues/apo personit të autorizuar (një dokument identifikimi)
• Dëshmi për personelin e punësuar – kontratat e punës ose deklarimet në ATK (lista e të punësuarve të deklaruar)
• Dëshmi mbi qarkullimin e biznesit – deklarimet në ATK ose pasqyrat financiare të ndërmarrjes

Të gjitha dokumentet do të dorëzohen në format elektronik, online!

Informatat e tjera

Mbështetja për procesin e aplikimit është në dispozicion përmes email adresës: [email protected]

Palët e interesuara, respektivisht NMVM-të që kanë aplikuar apo kanë përgatitur aplikimin nuk mund të paragjykojnë në asnjë formë asnjë të drejtë nga kjo thirrje, përveç të drejtave të cilat janë arritur në pajtim me DIG-4K dhe anëtarët e konosrciumit në formë të shkruar [Njoftimi për përzgjedhje dhe Memorandumi për Bashkëpunim]. Memorandumi për Bashkëpunim është dokumenti përfundimtar i procesit të përzgjedhjes së aplikantëve, i nënshkruar nga pala përfituese dhe DIG-4K dhe specifikon përfitimet që rrjedhin nga kjo thirrje si dhe obligimet përkatëse të palëve.

DIG-4K apo patneri implementues ALT Sh.P.K mbajnë të drejtën e plotë të refuzimit të aplikimit të cilësdo NMVM-je apo ndërprerjes së procesit në çdo kohë pa ndonjë sqarim apo kompensim!

Shënim: Ky aktivitet mbështetet nga Bashkimi Evropian dhe Qeveria e Kosovës përmes iniciativës #DIG-4K e cila zbatohet në kuadër të Rrjetit Evropian të Qendrave të Inovacionit Digjital (EDIH) nën koordinim të ITP-së dhe partnerëve implementues të DIG-4K të listuar më lartë. Shërbimet do të ofrohen nga anëtarët e konsorciumit të përbërë nga organizata të ndryshme të përqëndruara në mbështetjen e ndërmarrjeve për të digjitalizuar aktivitetet e tyre biznesore.

Shtojca 1

“Kriteret – Procesi i aplikimit dhe procedurat”

Hyrje

Ky dokument paraqet kushtet minimale për aplikim dhe kriteret për hartimin e listës së aplikantëve, vlerësimin dhe përzgjedhjen e 80 NMVM- ve që do të mbështeten në procesin e digjitalizimit. Këto kritere janë vendosur në përputhje me qëllimin e Programit të Rrjetit të Qendrave Evropiane të Inovacionit Digjital (EDIH), pjesë e Digital Europe Programme, bashkëfinancuar nga Bashkimi Evropian dhe Qeveria e Kosovës.

Qëllimi

Vendosja e kushteve dhe kritereve për përzgjedhje synon të mundësojë regjistrimin, shqyrtimin, vlerësimin dhe përzgjedhjen e NMVM-ve që aplikojnë për mbështetje, me qëllim krijimin e një liste të plotë të aplikantëve nga e cila do të përzgjidhen të paktën 80 ndërmarrje për mbështetje. Për këtë arsye, ky proces është projektuar të jetë transparent, objektiv dhe i bazuar në kritere të qarta dhe relevante, në përputhje me objektivat e projektit dhe rregullat procedurale. Në total, projekti parasheh mbështetjen e 80 NMVM-ve përmes ofrimit të ekspertizës për vlerësimin e maturitetit digjital dhe hartimit të strategjisë për transformimin digjital; më saktësisht, aplikimi dhe përzgjedhja janë aktivitete të bazuara në konkurencë, dhe i nënshtrohen tërësisë së komunikuar të kritereve.

Kushtet minimale për aplikim të NMVM-ve

Të drejtë aplikimi për mbështetje nga ky projekt kanë të gjitha NMVM-të e regjistruara në Kosovë. Për qëllimet e këtij projekti, ndërmarrje mikro, të vogla dhe të mesme konsiderohen ato që përmbushin kriteret sipas Ligjit Nr. 06/L-032 për Kontabilitet, Raportim Financiar dhe Auditim, neni 5:

• Mikro – deri në 10 të punësuar (qarkullim deri në 700,000 EUR)
• E Vogël – deri në 50 të punësuar (qarkullim deri në 8 milion EUR)
• E Mesme – deri në 250 të punësuar (qarkullim deri në 40 milion EUR)

Ndërmarrjet të cilat demonstrojnë potencial për rritje të mëtejshme të biznesit apo rritjen e konkurrueshmërisë përmes futjes dhe përdorimit të paisjeve dhe teknologjive digjitale; Ndërmarrjet e motivuara për të ndjekur transformimin digjital dhe përmirësimin e modelit të biznesit, të proceseve, për të rimenduar dhe modernizuar kulturën e të bërit biznes dhe të përvojave të konsumatorëve/blerësve, si dhe ndërmarrjet të cilat janë të përkushtuara për procesin dhe rrugëtimin e transformimit digjital të biznesit përgjatë periudhës implementuese gjashtëmujore (së paku në formën e kontributit financiar apo jofinanciar përmes dedikimit të kohës së personelit).

Sektorët prioritarë – NVMV-të

Nga pikëpamja sektoriale, projekti është gjithëpërfshirës, por disa sektorë vlerësohen si me interes strategjik si: financat (e-komerc, fintech), shëndetësia, arsimi, mjedisi, bujqësia, bioteknologjia, industria kulturore dhe kreative, qytetet e mençura (Smart Cities) dhe sektorë tjerë. Megjithatë, NMVM-të nga sektorë të tjerë gjithashtu kanë të drejtë të plotë për aplikim.

Si objektiv i rëndësishëm social i projekteve zhvillimore, me interes të theksuar është poashtu edhe mbështetja e NMVM-të në pronësi të grave apo NMVM-të të cilat punësojnë gra si pjesë e politikave për barazi gjinore.

Janë dy tërësi të kritereve për përzgjedhje këtë projekt:

(1) Kushtet minimale, të cilat shërbejnë për të cilat shërbejnë për regjistrimin e NMVM-ve në listën e aplikuesve.

(2) Kriteret për vlerësim paraprak të aplikimeve me qëllim të listimit në listën e ngushtë të 80 NMVM përfituese.

Faza I – Regjistrimi fillestar i NMVM-ve aplikuese

Regjistrimi bëhet vetëm në mënyrë elektronike përmes formularit në linkun: APLIKO KËTU

Kushtet minimale I – e drejta për aplikim

• Regjistrimi i biznesit në Kosovë – Statusi aktiv, i cili mund të verifikohet online në ARBK (Agjencia për Regjistrimin e Bizneseve në Kosovë)
• Madhësia e biznesit – NMVM (jo më shumë se 250 të punësuar), sipas deklarimit gjatë regjistrimit (deklarimi merret në formën e shkruar në formularin elektronik – online gjatë regjistrimit, shënohet nga aplikuesi)
• I themeluar si biznes, së paku deri para datës 30 Prill 2025 (para publikimit të thirrjes), sipas datës së regjistrimit të biznesit në certifikatë apo informatat për ndërmarrjen.
• Pajtueshmëria e NMVM-së aplikuese për të shqyrtuar digjitalizimin e biznesit me model aktual, të kulturës dhe përvojave të konsumatorëve /blerësve, rimenduar apo/dhe përmirësuar konceptin dhe modelin biznesor në drejtim të transformimit digjital (pajtimi jepet në formën e deklarimit të thjeshtë në formularin e aplikimit, shënohet kutia përkatëse)
• Përkushtim së paku gjatë periudhës 6-mujore të zbatimit, në formë financiare apo minimalisht në formë jofinanciare si kontribut përmes ndarjes/përcaktimit të kohës së të punësuarve për këtë projekt. (Deklarimi jepet në formularin elektronik – online gjatë regjistrimit nga ana e aplikuesit)

Faza II – Listimi i 80 NMVM-ve

Vlerësimi i aplikimeve që kanë kaluar kushtet minimale, përgatitja e pasqyrës të përgjithshme të aplikantëve për ITP DIG-4K dhe përgatitja e listës së ngushtë të 80 NMVM për shqyrtim.

Formula e vlerësimit (maksimumi i pikëve për kriter: 2 pikë, totali maksimal: 8 pikë, totali minimum: 0 pikë)

Kriteret e vlerësimit II – Pikët për listim në Top 80

• Shqyrtimi – Potenciali për rritje, përmirësim të konkurrueshmërisë dhe vlerës së shtuar nga digjitalizimi.
• Shqyrtimi – Gatishmëria për të marrë parasysh digjitalizimin e modelit aktual të biznesit, kulturës dhe përvojave të konsumatorëve/blerësve, rimendimi dhe/ose përmirësimi i konceptit dhe modelit biznesor drejt transformimit digjital.
• Lloji i aktivitetit ekonomik – Sektorët me interes strategjik.
• Gjinor – Bizneset në pronësi të grave të cilat i plotësojnë kriteret e mësipërme kanë përparësi.

Përgatitja e listës me aplikacionet e 80 NMVM-ve fituese do të bëhet mbi bazën e rezultateve të vlerësimit (pikëve), nga maksimumi deri te minimumi, duke përcaktuar kufirin tek 80 NMVM-të e listuara më sipër. Në rastet kur NMV-të kanë numër të barabart pikësh, aplikohet parimi i përparësisë sipas kohës së dorëzimit të aplikacionit duke iu referuar datës dhe kohës së aplikimit (sipas dëshmisë elektronike kur janë dorëzuar).

Për aplikantët, NMVM-të të cilat kanë arritur që të përfshihen në listën e përzgjedhjes, do të kërkohën dëshmitë për informatat e dhëna gjatë aplikimit. Ky është kusht I domosdoshëm që paraprin nëshkriminin dypalësh të Memorandumit pët Bashkëpunim, përmes të cilit verifikohen deklarimet dhe sigurohet barazia ndërmjet palëve në këtë proces konkurrues.

Procesi i vlerësimit të aplikimeve është i vazhdueshëm, dhe do të bëhet çdo fundjavë nga dita e hapjes së thirrjes, konkretisht në datat 2 Maj, 9 Maj, 16 Maj, 23 Maj dhe 30 Maj. Vlerësimi bëhet nga Komisioni i Projektit i cili përbëhet nga anëtarët e komitetit teknik të konsorciumit, ku nga lista e aplikuesve në fund të periudhave javore do të procedohet me vlerësim dhe përzgjedhje. Ky proces do të përsëritet deri sa të arrihet numri prej 80 NMVM-ve për mbështetje apo të përfundojë afati i thirrjes (mbyllja e thirrjes publike), cilido kusht të plotësohet i pari!

NMVM-të e përzgjedhura do të kontaktohen për nënshkrimin e Memorandumit për Bashkëpunim dhe përcaktimin e veprimeve dhe planit të punës lidhur me pakon e përfituar të mbështetjes për transformim digjital (digjitalizim).